🟥भारताच्या ‘ऑपरेशन सिंदूर’ने पाकिस्तानला भरली धडकी.- रात्री कराची, इस्लामाबाद, लाहोर, रावळपिंडीत केला ब्लॅकआऊट

नवी दिल्ली :- वृत्तसंस्था

भारतीय सैन्याने मंगळवारी रात्री पाकव्याप्त काश्मीरमधील 9 दहशतवादी तळांवर एअर स्ट्राईक केला. या मोहीमेला ऑपरेशन सिंदूर असे नाव देण्यात आले होते. या ऑपरेशनतंर्गत पीओकेमधील 9 ठिकाणी क्षेपणास्त्रांचा मारा करुन दहशतवादी तळ बेचिराख करण्यात आले. अवघ्या 25 मिनिटांत भारतीय वायूदलाने ही सगळी कामगिरी पार पाडत पाकिस्तानी सैन्याला चपराक लगावली. भारताची क्षेपणास्त्रे पाकिस्तानच्या रडारला पत्ता लागून न देता अचूक जाऊन लक्ष्यावर आदळली. भारतीय वायूदलाच्या या हल्ल्यामुळे पाकिस्तानी लष्कर प्रचंड धास्तावले होते. त्यामुळे पाकिस्तानमधील प्रमुख शहरांमध्ये बुधवारी रात्री ब्लॅकआऊट करण्यात आला होता.

🟥भारतीय वायूदल पुन्हा एखादा हवाई हल्ला करु शकते, अशी भीती पाकिस्तानला आहे. ‘ऑपरेशन सिंदूर’मध्ये लक्ष्य करण्यात आलेला बहावलपूरमधील जैश-ए-मोहम्मदचे मुख्यालय हे नियंत्रण रेषेपासून 100 किलोमीटर आतमध्ये आहे. भारतीय सैन्याने इतक्या आतमध्ये येऊन कारवाई केल्याने पाकिस्तानला धडकी भरली आहे. त्यामुळे पाकिस्तानने बुधवारी रात्री रावळपिंडी, इस्लामाबाद, लाहोर आणि कराची या प्रमुख शहरांमध्ये ब्लॅकआऊट केला होता. या शहरांमधील लाईट रात्री पूर्णपणे बंद करण्यात आली होती. त्यामुळे ही शहरे काळोखाच्या विळख्यात होती.

भारताच्या ‘ऑपरेशन सिंदूर’नंतर पाकिस्तानमध्ये प्रचंड घबराट पसरली आहे. त्यामुळे पाकिस्तानमध्ये सुरु असलेली पाकिस्तानी सुपर लीग रद्द होण्याची शक्यता आहे. पीएसएल लीगमधील संघांमध्ये अनेक परदेशी खेळाडू आहेत. भारत-पाक यांच्यातील वाढत्या तणावामुळे हे परदेशी खेळाडू धास्तावल्याची माहिती आहे. मात्र, पाकिस्तानी क्रिकेट बोर्डाने या वृत्ताचा इन्कार केला आहे. कोणत्याही परदेशी खेळाडूने PSL मधून बाहेर पडण्याची इच्छा व्यक्त केलेली नाही, असे पीसीबीने सांगितले. मात्र, या परदेशी खेळाडुंचे मॅनेजर सातत्याने भारत-पाक यांच्यातील तणावाच्या परिस्थितीवर लक्ष ठेवून असल्याचे समजते.