🛑कुठेही जाऊ नका, उद्धव ठाकरेंची साथ सोडू नका.- चंद्रकांत खैरेंची कार्यकर्त्यांना भावनिक साद.- दंडवतही घातला..
🔥अमेरिकेत अग्नितांडव.- लॉस एंजेलिस आगीच्या विळख्यात.- 12 हजारहून अधिक घरे खाक.- तर 16 जणांचा मृत्यू
छत्रपती संभाजीनगर :- प्रतिनिधी.
ऐन महापालिका निवडणुकीच्या तोंडावर ठाकरे गटाला मुंबई आणि छत्रपती संभाजीनगर येथे मोठे धक्के बसत आहेत. गेल्या काही दिवसांत अनेक माजी नगरसेवक आणि शेकडो कार्यकर्त्यांनी पक्षाला सोडचिठ्ठी दिली आहे. या सर्व घडामोडींच्या पार्श्वभूमीवर आज छत्रपती संभाजीनगरमध्ये झालेल्या पदाधिकाऱ्यांच्या मेळाव्यात बोलताना माजी खासदार चंद्रकांत खैरे यांनी ठाकरे गटाला सोडून जाणाऱ्या कार्यकर्त्यांना भावनिक साद घालत उद्धव ठाकरेंची साथ सोडू नका, असं म्हणत हात जोडून विनंती करत व्यासपीठावरच कार्यकर्त्यांना दंडवत घातला.
🟥आगामी महापालिका निवडणुकीच्या पार्श्वभूमीवर ठाकरे गटाकडून ठिकठिकाणी मेळावे आणि बैठका घेण्यात येत आहे. तसेच कार्यकर्त्यांना निवडणुकीच्या कामाला लागण्याच्या सूचना देण्यात येत आहेत. छत्रपती संभाजीनगर येथे शिवसेना ठाकरे गटाचा एक मेळावा आयोजित करण्यात आला होता. यावेळी झालेल्या सभेत माजी खासदार चंद्रकांत खैरे यांनी कार्यकर्त्यांना भावनिक साद घातली आणि पक्ष न सोडण्याचे आवाहन केले. इतकेच नव्हे तर भर मंचावर चंद्रकांत खैरे हे कार्यकर्त्यांसमोर नतमस्तक झाल्याचे म्हटले जात आहे. विधान परिषदेचे विरोधी पक्ष नेते अंबादास दानवे हेही यावेळी या मेळाव्याला उपस्थित होते.
ते यावेळी बोलताना म्हणाले कि, कुठेही जाऊ नका. उद्धव ठाकरेंची साथ सोडू नका. मी हात जोडून विनंती करतो. तुम्हाला इथे दंडवत घालतो. उद्धव ठाकरेंकडे आपल्याला पाहायचे आहे. परवाच्या कार्यक्रमात ते किती कळकळून बोलले. तुम्हाला विनंती करतो, कुठेही सोडून जाऊ नका. एकत्र मिळून काम करू. माझे काही चुकले तर मला बोललात तरी हरकत नाही. माझी विनंती अशी आहे की थांबा. उद्धव ठाकरेंच्या नेतृत्वाखाली आपण महापालिका निवडणुका, जिल्हा परिषद निवडणुकीत निवडून येऊ, असा दावा चंद्रकांत खैरे यांनी केला.
🔥अमेरिकेत अग्नितांडव.- लॉस एंजेलिस आगीच्या विळख्यात.- 12 हजारहून अधिक घरे खाक.- तर 16 जणांचा मृत्यू
न्यूयाँर्क :- वृत्तसंस्था.
मागील काही दिवसांपासून अमेरिकेतील लॉस एंजेलिस आगीच्या विळख्यात आले आहे. जंगलात लागलेल्या आग रहिवासी भागात पसरली असून, या आगीमुळे आतापर्यंत 16 जणांचा मृत्यू झाला आहे, तर 12 हजाराहून अधिक इमारती जळून खाक झाल्या आहेत. दरम्यान, या भीषण आगीमुळे परिस्थिती आणखी बिकट होईल, असा इशारा देण्यात आला आहे. तसेच, अनेक कार्यक्रमही रद्द करण्यात आले आहेत.
🟥लॉस एंजेलिस काउंटीमध्ये अंदाजे 36,000 एकर जमीन अजूनही आगीच्या विळख्यात आहे. या आगीने आतापर्यंत 5,300 हून अधिक इमारतींचे नुकसान झाले आहे. लॉस एंजेलिसच्या पूर्वेकडील ईटन कॅनियन आणि हायलँड पार्कमधील शाळा आणि घरांना आग लागली आहे. दोन प्राथमिक शाळा आणि पॅलिसेड्स चार्टर हायस्कूलच्या काही भागांचे नुकसान झाले. आगीने अंदाजे 14,000 एकर जमीन नष्ट केली, तर 5,000 हून अधिक इमारतींचे मोठ्या प्रमाणावर नुकसान केले. अमेरिकेतील दुसरी सर्वात मोठी शाळा लॉस एंजेलिस युनिफाइड स्कूल डिस्ट्रिक्टने विद्यार्थी आणि कर्मचाऱ्यांना धोकादायक हवेपासून गुवाचवण्यासाठी गुरुवार आणि शुक्रवारी शाळा बंद ठेवल्या. श्वसनाच्या समस्यांनी ग्रस्त असलेल्या मुलांसाठी ही हवा हानिकारक असू शकते, त्यामुळे शाळेने हा निर्णय घेतला.
🔴पॅसिफिक पॅलिसेड्सचे रहिवासी केनेथ यांनी सिन्हुआला सांगितले की, आम्हाला परिसर रिकामा करावा लागला, त्यामुळे आमचे जीवन विस्कळीत झाले आहे. संपूर्ण शहर ठप्प आहे, पण निदान आम्ही जिवंत असल्याचे समाधान आहे. मनोरंजन उद्योगाला आग, वीज खंडित आणि विषारी हवेचा मोठा फटका बसला आहे. त्यामुळे अनेक चित्रपट आणि टीव्ही शूट्स रद्द करण्यात आले आहेत. यासोबतच अनेक प्रीमियर आणि कार्यक्रमही रद्द करावे लागले. येत्या काही दिवसांत ताशी 120 किलोमीटर वेगाने वारे वाहण्याची शक्यता आहे. एलए टाईम्सने एका हवामान तज्ज्ञाच्या हवाल्याने म्हटले की, आज रात्री आणि सोमवार ते बुधवारपर्यंत वारे अधिक मजबूत होतील, त्यामुळे परिस्थिती आणखी बिघडू शकते. अमेरिकेचे अध्यक्ष जो बायडेन यांनी या विनाशाला युद्धाची उपमा दिली आहे. लूटमार रोखण्यासाठी रिकामी केलेल्या भागात संचारबंदी लागू करण्यात आली आहे, किमान दोन डझन लोकांना अटक करण्यात आली आहे. कॅनडाबरोबरच मेक्सिकोनेही कॅलिफोर्नियातील बचाव आणि अग्निशमन कार्यात सहभाग घेतला आहे. मेक्सिकोमधील 14,000 हून अधिक अग्निशामक पॅलिसेड्सच्या आगीशी लढण्यासाठी अमेरिकेत आहेत.
