जिल्हा बँक मुख्यमंत्री रोजगार निर्मिती योजनेलाही करणार कर्ज पुरवठा…….संचालक मंडळाच्या बैठकीत झाला महत्त्वपूर्ण निर्णय.- रोजगार वाढीसाठी उत्पादन व सेवा क्षेत्रातील उद्योगवाढीला मिळणार चालना…….
कोल्हापूर, दि. २८:
कोल्हापूर जिल्ह्यातील बेरोजगार सुशिक्षित युवक -युवतींच्या हाताला उद्योग वाढीतून रोजगार देण्यासाठी कोल्हापूर जिल्हा मध्यवर्ती सहकारी बँक नेहमीच आघाडीवर राहिली आहे. जिल्हा बँक आता मुख्यमंत्री रोजगार निर्मिती कार्यक्रमांतर्गतही कर्ज पुरवठा करणार आहे. बँकेचे अध्यक्ष आमदार हसनसो मुश्रीफ यांच्या अध्यक्षतेखाली झालेल्या संचालक मंडळाच्या बैठकीत हा महत्त्वाचा निर्णय झाला. या योजनेअंतर्गत उत्पादन व सेवा या दोन क्षेत्रातील उद्योगांना प्राधान्य देण्यात येणार आहे.
याबाबत अधिक माहिती अशी, महाराष्ट्र सरकारने उद्योजकतेला चालना देण्यासाठी सर्व समावेशक मुख्यमंत्री रोजगार निर्मिती कार्यक्रम ही महत्त्वकांक्षी योजना हाती घेतली आहे. या कार्यक्रमांतर्गत कृषी पूरक व्यवसाय कृषी आधारित उद्योग इ वाहतूक सेवा उद्योग यामधील रोजगार आणि स्वयंरोजगारांच्या नवीन संधींचा विचार केला आहे. या योजनेअंतर्गत वित्तपुरवठा करण्यासाठी यापूर्वी सरकारी बँका, तसेच काही खाजगी क्षेत्रातील शेड्युल्ड बँकांचा समावेश होता. त्याबरोबरच कोल्हापूर जिल्हा मध्यवर्ती सहकारी बँकेचाही समावेश नव्याने झालेला आहे.
“योजनेची उद्दीष्टे…….”
● सध्या कार्यरत असलेल्या व नवीन स्थापित होणाऱ्या वैयक्तिक उद्योगांची पत मर्यादा वाढवणे………
● उत्पादनांच्या ब्रँडिंग व विपणनासह त्यांना संघटित पुरवठा साखळीशी जोडणे………..
●साठवणूक प्रक्रिया, सुविधा, पॅकेजिंग व विपणन अशा सामूहिक सेवा तसेच उद्योग वाढीसाठीच्या सर्वंकष सेवांचा सूक्ष्म उद्योगांना अधिकाधिक लाभ मिळवून देणे…..
या योजनेमध्ये पाच ते सात वर्षाच्या मुदतीने कर्ज व खेळत्या भांडवलासह रुपये ४० लाखापर्यंत वित्त पुरवठा होणार आहे. सर्वसाधारण प्रवर्गासाठी शहरी भागात १५ टक्के व ग्रामीण भागात २५ टक्के अनुदान मिळणार आहे. तसेच अनुसूचित जाती -जमातीसह महिला, अपंग, माजी सैनिक या प्रवर्गासाठी शहरी भागात २५ टक्के, ग्रामीण भागात ३५ टक्के अनुदान मिळणार आहे.
या बैठकीमध्ये दुसरा महत्त्वाचा निर्णयही झाला. जिल्ह्यातील विकास सेवा संस्थांना नाबार्डच्या ‘बहुउद्देशीय सेवा केंद्र’ या योजनेतील गुंतवणुकीचा फायदा मिळावा म्हणून धोरणात शिथिलता केली आहे. त्यामुळे, जिल्ह्यातील जास्तीत जास्त विकास संस्थांना स्वतःचे उत्पन्न वाढविण्यासाठी मदत होणार आहे.
यावेळी खासदार प्रा. संजयदादा मंडलिक, आमदार राजेश पाटील, बाबासाहेब पाटील -आसुर्लेकर, प्रताप उर्फ भैय्या माने, संतोष पाटील, सुधीर देसाई, प्रा. अर्जुन आबिटकर, विजयसिंह माने, सौ. श्रुतिका काटकर, सौ. स्मिता गवळी आदी संचालक तसेच मुख्य कार्यकारी अधिकारी डॉ. ए. बी. माने उपस्थित होते.
यावेळी बँकेचे व्यवस्थापक जी. एम. शिंदे, कायदा व सल्ला विभागाचे व्यवस्थापक आर. जे. पाटील, अकाउंट बँकिंग विभागाचे व्यवस्थापक विकास जगताप, शेती कर्जे विभागाचे व्यवस्थापक चंद्रकांत रावण, व्यक्तीगत कर्जे विभागाचे व्यवस्थापक एस. के. बावधनकर आदी अधिकारी उपस्थित होते.
