🟥बदलापूर एन्काउंटर प्रकरणाची नव्याने चौकशी होणार.- डीजीपी रश्मी शुक्ला यांनी नवीन एसआयटी टीम स्थापन केली!
🟥राज्यातील महापालिका निवडणुकीसाठी २०२२ मध्ये जी प्रभाग रचना होती, तीच राहणार.- उपमुख्यमंत्री एकनाथ शिंदे
🟥धावत्या दुचाकीवर वीज कोसळली.- शिक्षकाचा जागीच मृत्यू…
मुंबई – प्रतिनिधी.
बदलापूर लैंगिक अत्याचार प्रकरणातील आरोपींच्या मृत्यूची चौकशी करण्यासाठी आता एक नवीन पथक तयार केले जाणार आहे. बदलापूर शाळेतील लैंगिक अत्याचार प्रकरणातील आरोपी अक्षय शिंदेच्या कोठडीतील मृत्यूची चौकशी करण्यासाठी महाराष्ट्र पोलिस महासंचालकांनी एक नवीन विशेष तपास पथक स्थापन केले आहे. माहिती देताना अधिकाऱ्याने सांगितले की, सर्वोच्च न्यायालयाच्या आदेशानुसार डीजीपी रश्मी शुक्ला यांनी स्वतः एक नवीन एसआयटी टीम तयार केली आहे.
एसआयटीचे नेतृत्व अतिरिक्त पोलिस आयुक्त दत्ता शिंदे करतात, जे मीरा-भाईंदर-वसई-विरार (एमबीव्हीव्ही) पोलिसांशी संलग्न उपमहानिरीक्षक दर्जाचे अधिकारी आहेत. एसआयटी टीममध्ये पिंपरी चिंचवडचे एक पोलिस उपायुक्त, एक सहाय्यक पोलिस आयुक्त, दोन वरिष्ठ निरीक्षक (ज्यांपैकी एक नवी मुंबईचे आहे), दोन सहाय्यक पोलिस निरीक्षक, एक उपनिरीक्षक आणि एक सहाय्यक उपनिरीक्षक यांचा समावेश आहे.
💥सीआयडी या प्रकरणाचा तपास करत होते
डीसीपी आणि वरिष्ठ पोलिस निरीक्षकांव्यतिरिक्त, सर्व अधिकारी एमबीव्हीव्ही आयुक्तालयातील आहेत, असे अधिकाऱ्याने सांगितले. त्यांनी सांगितले की, एसआयटीने गुन्हे अन्वेषण विभागाकडून (सीआयडी) या प्रकरणाशी संबंधित सर्व कागदपत्रे ताब्यात घेतली आहेत आणि प्रकरणाचा नव्याने तपास सुरू केला आहे. पूर्वी या प्रकरणाचा तपास सीआयडी करत होता.
🔴विद्यार्थिनींचा लैंगिक छळ
अधिकाऱ्याने सांगितले की, यापूर्वी अतिरिक्त पोलिस आयुक्त दत्ता शिंदे यांनी ठाणे आणि नवी मुंबईत काम केले आहे आणि त्यांना या परिसराची चांगली माहिती आहे. ते पालघरमध्ये पोलिस अधीक्षकही राहिले आहेत. ठाणे जिल्ह्यातील बदलापूर येथील एका शाळेत बालवाडीतील दोन विद्यार्थिनींवर लैंगिक अत्याचार केल्याचा आरोप असलेला अक्षय शिंदे (२४) पोलिसांच्या गोळीबारात ठार झाला. २३ सप्टेंबर २०२४ रोजी तळोजा मध्यवर्ती कारागृहातून बदलापूर पोलिस ठाण्यात नेत असताना शिंदे यांनी एका पोलिस कर्मचाऱ्याकडून बंदूक हिसकावून गोळीबार केल्याचा आरोप आहे.
🟥नवीन एसआयटी स्थापनेसाठी सूचना
कोठडीतील हत्येमुळे शिंदे कुटुंबाने मुंबई उच्च न्यायालयात धाव घेतली आणि हा बनावट चकमक असल्याचा दावा केला. उच्च न्यायालयाच्या आदेशानंतरही सीआयडीने पोलिस अधिकाऱ्यांविरुद्ध गुन्हा दाखल न केल्याने, न्यायालयाने सह पोलिस आयुक्त (गुन्हे) लखमी गौतम यांच्या नेतृत्वाखालील एसआयटीकडून या प्रकरणाची चौकशी करण्याचे निर्देश दिले.त्यानंतर महाराष्ट्र सरकारने सर्वोच्च न्यायालयात धाव घेतली, ज्याने राज्याच्या डीजीपींना नवीन एसआयटी स्थापन करण्याचे आदेश दिले. मुंब्रा पोलिस ठाण्यात आधीच गुन्हा दाखल असल्याने नवीन एफआयआर दाखल करण्याची आवश्यकता नसल्याचेही आदेशात म्हटले आहे, असे अधिकाऱ्याने सांगितले.
🟥राज्यातील महापालिका निवडणुकीसाठी २०२२ मध्ये जी प्रभाग रचना होती, तीच राहणार.- उपमुख्यमंत्री एकनाथ शिंदे
पुणे :- प्रतिनिधी.
सर्वोच्च न्यायालयाने दिलेल्या आदेशानुसार २०२२ मध्ये जी प्रभाग रचना होती, तीच प्रभाग रचना राज्यातील महापालिकांच्या निवडणुकीसाठी राहणार आहे, अशी माहिती उपमुख्यमंत्री एकनाथ शिंदे यांनी दिली.राज्यातील महापालिका आयुक्त आणि नगरपरिषदांचे मुख्याधिकारी यांच्या यशदा येथे आयोजित केलेल्या दोन दिवसीय कार्यशाळेस उपमुख्यमंत्री शिंदे यांनी गुरुवारी (दि. १५) भेट दिली. त्यापूर्वी त्यांनी माध्यमांशी संवाद साधला.
ते म्हणाले, सर्वोच्च न्यायालयाच्या आदेशानुसार निवडणूक आयोगाचे काम सुरू झाले आहे. सर्वोच्च न्यायालयाच्या आदेशानुसार २०२२ नुसारच प्रभाग रचना असेल. आम्ही लोकसभा, विधानसभा निवडणुका महायुतीच्या माध्यमातून लढलो. आता येणाऱ्या महापालिकांच्या निवडणुकाही आम्ही महायुतीच्याच माध्यमातून लढणार आहोत. पुणे महानगर प्रदेश विकास प्राधिकरणाच्या (पीएमआरडीए) विकास आराखड्यात (डीपी) काही त्रुटी होत्या, त्यावर आक्षेप आले होते. या त्रुटी दूर करून नवीन डीपीमध्ये सर्वसामान्यांचे हित जपले जाईल, नियोजित शहर करण्याचा आमचा प्रयत्न असेल, असेही शिंदे म्हणाले.
तुर्कस्थानने पाकिस्तानला पाठिंबा देण्याचे पाप केले आहे. त्या तुर्कस्थानला धडा शिकवणाऱ्या व्यापाऱ्यांचे मी अभिनंदन करतो. व्यापाऱ्यांनी कसल्याही धमक्यांना घाबरू नये, सरकार त्यांच्या सोबत आहे. राज्यभर भारतीय लष्कराच्या तिन्ही दल यांच्या शौर्याला सलाम करण्यासाठी तिरंगा रॅली काढण्यात येत आहे, असेही शिंदे म्हणाले.
🟥धावत्या दुचाकीवर वीज कोसळली.- शिक्षकाचा जागीच मृत्यू…
नांदेड :- प्रतिनिधी.
नांदेड जिल्ह्यातील एका शिक्षकाचा वीज अंगावर कोसळून मृत्यू झाल्याची धक्कादायक घटना समोर आली आहे. धावत्या दुचाकीवरच वीज कोसळल्याने शिक्षकाचा जागीच मृत्यू झाला. या घटनेनं परिसरात हळहळ व्यक्त होत आहे.
🟥नांदेडमध्ये धावत्या दुचाकीवर वीज कोसळल्याने एका शिक्षकाचा रस्त्यातच मृत्यू झाल्याची घटना घडली. नांदेड जिल्ह्यातील माहूर तालुक्यातील मालवाडा घाटात आज दुपारी 3 वाजता वीजांच्या कडकडाटासह किरकोळ पाऊस झाला. मात्र, वादळी वारा आणि वीजांच्या कडकडाटाने परिसर हादरुन गेला होता. या दरम्यान आपल्या करंजी या गावाकडे शिक्षक संजय पांडे दुचाकीवरुन जात होते. दुर्दैवाने त्याचवेळी त्यांच्या अंगावर वीज कोसळली, त्यात संजय पांडे यांचा रस्त्यातच मृत्यू झाला. या घटनेनंतर स्थानिकांनी घटनास्थळी धाव घेतली.
