आजरा अर्बन बँकेची कर्मचाऱ्यांना ७० लाखाची वेतन वाढ
आजरा.- प्रतिनिधी.
दि आजरा अर्बन को-ऑप. बँक लि, आजरा (मल्टी-स्टेट) आणि कोल्हापूर डिस्ट्रीक्ट बँक एम्प्लॉईज युनियन (युनिट दि आजरा अर्बन को-ऑप. बँक) यांचेमध्ये कर्मचारी पातळीवर द्विपक्षीय वेतनाचा करार जिल्हा सहाय्यक कामगार आयुक्त वि. वि. घोडकेसो यांचे समोर संम्मत झाला. याप्रसंगी कामगार नेते कॉम्रेड गोविंदराव पानसरे युनियनचे अध्यक्ष श्री. भगवान पाटील, आजरा अर्बन को-ऑप. बँकेचे अध्यक्ष रमेश गुरुलिंगाप्पा कुरुणकर उपस्थित होते. सदर करारामुळे कर्मचाऱ्यांना एकूण वार्षिक ७० लाखाची भरघोस वाढ देणेत आलेली आहे. सदर वाढ मासिक कमीत कमी रु. ७००/- तर अधिकाधिक रु.६०००/- इतकी आहे.
दि आजरा अर्बन को-ऑप. बँकेचा मिश्र व्यवसाय जवळ जवळ १५०० कोटींच्या घरात असून बँकेने आपल्या महाराष्ट्र व कर्नाटक राज्यातील ३२ शाखांद्वारे एक सशक्त व सक्षम आर्थिक बँक म्हणून मान्यता मिळवलेली आहे. याप्रसंगी बोलताना कामगार नेते कॉम्रेड गोविंदराव पानसरेचे अध्यक्ष श्री. भगवान पाटीलसो यांनी सदर द्विपक्षीय करार अत्यंत सलोख्याच्या वातावरणात झाल्याचे सांगितले. तर बँकेचे अध्यक्ष रमेश गुरुलिंगाप्पा कुरुणकरसो यांनी यावेळी बँकेचे व्यवस्थापन सतत कर्मचाऱ्यांच्या हिताचे निर्णय घेत असून सदर करार कर्मचाऱ्यांना भविष्यातील नव्या आवाहनांना तोंड देण्यासाठी स्फूर्तीदायक ठरेल असे सांगीतले. सदर द्विपक्षीय करार करण्यासाठी आण्णा भाऊ संस्था समुहाचे प्रमुख व बँकेचे जेष्ठ संचालक अशोकअण्णा चराटीसो यांनी विशेष प्रयत्न केले. या कराराच्यावेळी व्यवस्थापना वतीने व्हा.चेअरमन सुनील मगदुम, संचालक सुरेश डांगसो, विलास नाईकसो, डॉ. अनिल देशपांडेसो उपस्थित होते. या ऐतिहासीक करारामुळे मिळालेल्या वेतनवाढीमुळे आजरा बँकेच्या कर्मचाऱ्यांनी आपला आनंद व्यक्त केला आणि व्यवस्थापनाला आपला व्यवसायवाढीचे आश्वासन दिले. याप्रसंगी बँकेचे मुख्य कार्यकारी अधिकारी श्री. प्रशांत गंभीरसो, प्रशासन व बोर्डचे मुख्याधिकारी श्री. नितीन बेल्लदसो, सेवक प्रतिनिधी श्री. प्रकाश परळकर, श्री. गौतम देशपांडे आदी उपस्थित होते.
