सरकारी कर्मचाऱ्यांच्या वाहतूक भत्त्यात वाढ.- सरकारचा निर्णय
मुंबई. – प्रतिनिधी. ०१
सातव्या वेतन आयोगाच्या पार्श्वभूमीवर राज्य सरकारी कर्मचारी, अधिकाऱ्यांच्या वाहतूक भत्यात वाढ करण्याच्या वित्त विभागाच्या प्रस्तावाला राज्य मंत्रीमंडळाने गुरुवारी मान्यता दिली. यामुळे राज्य सरकारी व इतर पात्र कर्मचाऱ्यांच्या दरमहा वाहतूक भत्त्याच्या दरात एक एप्रिलपासून वाढ होणार आहे. वाहतूक भत्त्यात वाढ देण्याच्या या निर्णयामुळे सरकारच्या तिजोरीवर ७०० कोटी रुपयांचा बोजा पडणार आहे.
या निर्णयामुळे प्रथम श्रेणी अधिकाऱ्यांच्या वाहतूक भत्त्यात दरमहा तीन हजारांची, द्वितीय श्रेणी अधिकाऱ्यांच्या वाहतूक भत्त्यात दरमहा दोन हजारांची तर तृतीय श्रेणी कर्मचाऱ्यांच्या वाहतूक भत्त्यात दरमहा एक हजार रुपयांची वाढ झाली आहे. अंध, अपंग व मूकबधीर कर्मचाऱ्यांच्या वाहतूक भत्त्यात दुपटीने वाढ झाल्याची माहिती एका अधिकाऱ्याने दिली. ज्यांच्याकडे शासकीय वाहन नाही अशा सरकारी अधिकारी, कर्मचाऱ्यांनाच हा भत्ता दिला जातो.
सरकारच्या या निर्णयाचे महाराष्ट्र राजपत्रित अधिकारी महासंघाने स्वागत केले आहे. वित्त व नियोजनमंत्री अजित पवार यांच्यासोबत झालेल्या बैठकीतील आश्वासनानुसार हा निर्णय घेण्यात आला ही स्वागतार्ह बाब आहे, असे ग. दि. कुलथे म्हणाले.
