डोनाल्ड ट्रम्प थांबलेल्या आंतरराष्ट्रीय हॉटेलमध्ये अंदाधुंद गोळीबार.- ट्रम्प थोडक्यात बचावले.- घटनेने अमेरिकेत उडाली खळबळ
वॉशिंग्टनः- वृत्तसंस्था
व्हाइट हाऊस कॉरेस्पॉडेंट्स डिनर कार्यक्रमात राष्ट्रपती डोनाल्ड ट्रम्प यांच्यासमोरच गोळीबाराची घटना घडल्याने अमेरिकेत खळबळ माजली आहे. या घटनेमुळे ट्रम्प यांच्या सुरक्षेचा प्रश्न गंभीर बनला आहे. या कार्यक्रमात डोनाल्ड ट्रम्पयांच्यासोबतच उपराष्ट्रपती जे. डी व्हान्स व पत्नी मेलानिया ट्रम्प यादेखील हजर होत्या.
या कार्यक्रमाच्या ठिकाणी गोळीबाराची घटना घडल्यानंतर सीक्रेट सर्व्हिसच्या जवानांनी तातडीने राष्ट्रपती ट्रम्प यांना सुरक्षितपणे तिथून बाहेर काढले. गोळीबाराच्या आवाजामुळे हॉटेलमध्ये गोंधळ माजला. पत्रकार आणि पाहुण्यांना लपण्यासाठी टेबलाखाली जावे लागले. सुरक्षा जवानांनी त्यानंतर तातडीने सूत्रे हाती घेत हॉटेल रिकामे केले. या घटनेतील संशयिताला घटनास्थळी पकडले असून राष्ट्रपती डोनाल्ड ट्रम्प सुरक्षित असल्याचं बोलले जाते. या घटनेबाबत ट्रम्प यांनी त्यांच्या सोशल मीडियावर पोस्ट केली आहे. त्यात लिहिलंय की, आज संध्याकाळी डीसीमध्ये खूप धावपळ होती. सीक्रेट सर्व्हिस आणि सुरक्षा यंत्रणांनी उत्कृष्ट काम केले. त्यांनी मोठे शौर्य आणि चपळाई दाखवली.
गोळीबार करणाऱ्याला पकडण्यात आले आहे. मी कार्यक्रम सुरू ठेवण्याची शिफारस केली आहे, परंतु पुढील निर्णय पूर्णपणे सुरक्षा यंत्रणांच्या निर्णयावर अवलंबून असतील. निर्णय काहीही असो, आजची संध्याकाळ अपेक्षेप्रमाणे नव्हती आणि आम्हाला तो कार्यक्रम पुन्हा आयोजित करावा लागेल असं त्यांनी म्हटलं. दरम्यान, गोळीबाराच्या घटनेनंतर सुरक्षा कर्मचाऱ्यांनी संपूर्ण हिल्टन हॉटेल आणि आजूबाजूचा परिसर सील केला. हे हॉटेल पूर्णपणे रिकामे करण्यात आले. सुरक्षा कर्मचारी प्रत्येक फुटेजची तपासणी करत आहेत. ट्रम्प आणि मेलानिया ट्रम्प यांना सुरक्षितपणे व्हाईट हाऊसमध्ये हलवण्यात आले आहे.
