प्रकाश आबिटकर आमदार चे झाले नामदार.. आजऱ्यात जल्लोष.- उत्सवाचे वातावरण.
( माजी मुख्यमंत्री एकनाथ शिंदे यांनी दिलेला शब्द पाळला.)
आजरा.- प्रतिनिधी.
महाराष्ट्र राज्याच्या राज्य मंत्रिमंडळ शपथविधी नागपूर येथे मोठ्या उत्साहात संपन्न झाला. या समारंभात राधानगरी-भुदरगड-आजराचे आमदार प्रकाश आबिटकर यांनी कॅबिनेट मंत्री म्हणून शपथ घेतल्याबद्दल आजरा येथे महायुतीचे व शिवसेना शिंदे गटाचे पदाधिकारी, कार्यकर्ते आमदार आबिटकर प्रेमी यांनी यांनी आजरा शहरात जल्लोष केला. तालुक्याच्या ग्रामीण भागातही आमदार आबिटकर यांना मंत्रिपद मिळाल्याने जल्लोष करण्यात आला. राधानगरी विधानसभा मतदारसंघाला प्रथमच मंत्रिपद मिळाल्याने सर्वत्र आनंदाचे वातावरण होते.
आमदार आबिटकर यांनी राधानगरी-भुदरगड-आजरा विधानसभा मतदारसंघातून सलग तिसऱ्यांदा ऐतिहासिक विजय प्राप्त केला आहे. विधानसभा निवडणुकीच्या अगोदर तत्कालीन मुख्यमंत्री व विद्यमान उपमुख्यमंत्री एकनाथ शिंदे हे राधानगरी-भुदरगडच्या दौऱ्यावर आले असता त्यांनी जाहीर सभेत आबिटकर यांना तिसऱ्यांदा आमदार करा मी नामदार करतो, असं अभिवचन मतदार संघातील जनतेला दिलं होतं. त्यानुसार नवीन विधानसभा अस्तित्वात आल्यानंतर मंत्रिमंडळात आबिटकर यांचा समावेश होणार का याकडे साऱ्यांचे लक्ष लागून राहिले होते. विविध कारणांनी लांबलेला मंत्रिमंडळाचा शपथविधी पार पडला. यामध्ये आमदार आबिटकर यांनी कॅबिनेट मंत्री म्हणून शपथ घेतली. यामुळे मतदार संघामध्ये उत्साहाचे वातावरण निर्माण झाले आहे.
आमदार आबिटकर यांना मंत्रीपद मिळणार हे शनिवारी मध्यरात्री निश्चित झाल्यानंतर रविवारी पहाटेपासूनच सोशल मीडियावर आमदार आबिटकर यांच्या अभिनंदनाच्या पोस्ट व्हायरल होऊ लागल्या. त्याचबरोबर आजरा शहरासह ग्रामीण भागातील कार्यकर्त्यांनी जल्लोषाची तयारी केली होती. आजरा शहरातील छत्रपती शिवाजी महाराज पुतळ्याजवळ एलईडी स्क्रीनच्या माध्यमातून मंत्रिमंडळाच्या शपथविधी सोहळ्याचे लाईव्ह प्रक्षेपण करण्यात आले. या ठिकाणी आमदार प्रकाश आबिटकर यांचा शपथविधी होत असताना कार्यकर्त्यांनी मोठा जल्लोष केला. फटाक्यांची आतषबाजी करण्यात आली. साखर पेढ्याचे वाटप करण्यात आले. यानंतर कार्यकर्त्यांनी आजऱ्याचे ग्रामदैवत रवळनाथ मंदिराजवळ जावून आनंदोत्सव साजरा केला. छ. संभाजी चौकात देखील फटाक्यांची आतषबाजी करण्यात आली. यावेळी अण्णाभाऊ संस्था समूहाचे प्रमुख अशोक चराटी, विलास नाईक, विजय पाटील, दशरथ अमृते, परशराम बामणे, शिवसेना उपजिल्हाप्रमुख राजेंद्र सावंत, भाजपा तालुकाध्यक्ष बाळ केसरकर, नाथ देसाई, शहरप्रमुख विजय थोरवत, धनंजय पाटील, आनंदा कुंभार, सुनील दिवेकर, संदेश पाटील, अमित खेडेकर, मंदार बिरजे, संतोष जाधव, युवराज पाटील, लहू वाकर, अनिकेत चराटी यासह महायुतीचे पदाधिकारी, कार्यकर्ते व नागरिक मोठ्या संख्येने उपस्थित होते.
