राज्यात ४० हजार ९५६ नवीन रुग्णांची भर
【 तर ७१ हजार ९६६ रुग्ण बरे झाले. 】
मुंबई. प्रतिनिधी.
🟩 आतापर्यंत ४५ लाख ४१ हजार ३९१ जण बरे झाले
🟩 एकूण रुग्णसंख्या ५१ लाख ७९ हजार ९२९
🟩 दिवसभरात ७९३ रुग्णांचा मृत्यू.
🟩 एकूण मृत्यू ७७ हजार १९१
🟩 रुग्ण बरे होण्याचे ८७.६७ टक्के
🟩 सध्या ०५ लाख ५८ हजार ९९६ रुग्णांवर उपचार सुरु
राज्यात कोरोना प्रादूर्भावाच्या दुसऱ्या लाटेत शासनाला यश येताना दिसत आहे. कारण सलग दुसऱ्या दिवशी नवीन रुग्णसंख्या कमी झाली आहे आणि नव्या रुग्णांपेक्षा बरे झालेल्या रुग्णांची संख्या जास्त नोंदवली गेली आहे. राज्यात गेल्या २४ तासांत ४० हजार ९५६ नवे रुग्ण आढळले आहेत. तर ७१ हजार ९६६ रुग्ण बरे झाले आहे. राज्यात सध्या ५ लाख ५८ हजार ९९६ सक्रिय रुग्ण आहेत. तर आतापर्यंत कोरोनाची लागण झालेल्यांची संख्या ५१ लाख ७९ हजार ९२९ इतकी झाली आहे. तर बरं झालेल्यांचा आकडा ४५ लाख ४१ हजार ३९१ इतका आहे. आतापर्यंत ७७ हजार १९१ रुग्णांचा कोरोनामुळे मृत्यू झाला आहे.
राज्यात एप्रिल महिन्यात कोरोनाच्या दुसऱ्या लाटेचा सर्वाधिक उद्रेक पाहायला मिळाला. दैनंदिन रुग्णसंख्या रोज नवे उच्चांक गाठत होती. ही रुग्णसंख्या तब्बल ७० हजारांच्या उंबरठ्यावर पोहचली होती. त्यात आता वेगाने घट होताना दिसत आहे. सोमवारी राज्यात ३७ हजार ३२६ इतक्या नवीन रुग्णांची नोंद झाली होती. गेल्या काही आठवड्यांतील हा सर्वात निचांक ठरला होता. तर आज त्यात थोडी वाढ पाहायला मिळाली आहे. आज राज्यात ४० हजार ९५६ नवीन रुग्ण आढळले आहेत. त्याचवेळी कोरोनावर मात करणाऱ्या रुग्णांचा आजचा आकडा मोठा राहिला आहे. आज तब्बल ७१ हजार ९६६ रुग्ण कोरोनामुक्त झाले आहेत. त्यामुळे रुग्ण बरे होण्याचे प्रमाण वाढले आहे. राज्यात आतापर्यंत ४५ लाख ४१ हजार ३९१ जण बरे झाले असून रुग्ण बरे होण्याचे प्रमाण सध्या ८७.६७ टक्के इतके झाले आहे.
सध्या राज्यातील मृत्यूदर १.४९ टक्के एवढा आहे. आजपर्यंत तपासण्यात आलेल्या २ कोटी ९८ लाख ४८ हजार ७९१ प्रयोगशाळा नमुन्यांपैकी ५१ लाख ७९ हजार ९२९ ( १७.३५ टक्के ) नमुने पॉझिटिव्ह आले आहेत. सध्या राज्यात ३५ लाख ९१ हजार ७८३ व्यक्ती होम क्वारंटाइनमध्ये आहेत तर २९ हजार ९५५ व्यक्ती संस्थात्मक क्वारंटाइनमध्ये आहेत.
राज्यातील अॅक्टिव्ह रुग्णांची संख्या घटली
राज्यातील अॅक्टिव्ह अर्थात उपचार घेत असलेल्या रुग्णांची संख्या सध्या ५ लाख ५८ हजार ९९६ इतकी खाली आली आहे. त्यात मुंबई, पुणे, ठाणे या शहरांतील आकडे वेगाने खाली येत आहेत.
पुणे जिल्ह्यात सध्या ९५ हजार ७३१ अॅक्टिव्ह रुग्ण आहेत तर नागपूर जिल्ह्यात ५३ हजार २० रुग्ण आहेत. मुंबईतील रुग्णसंख्या ४० हजार १६२ इतकी खाली आली आहे तर ठाणे जिल्ह्यातील रुग्णसंख्या ३१ हजार ४४६ इतकी आहे. नाशिक जिल्ह्यात सध्या २६ हजार ८०६ रुग्णांवर उपचार सुरू आहेत.
